I te Rāapa te 11 o Mātahi-ā-te-tau i hinga te poutokomanawa o tō mātou whare, a Bessie Hildebrand. E te whānau pani, kei te oha ki a koutou ko Keith, Jenny, John. He nui te pōuri, te mamae, ā, e ngau nei te aroha mō koutou. Kua moe noa ia i tōna moenga roa. Ka tukua atu tāku mihi mō tēnei rangatira.
E tangi hotu nei tō tupuna maunga, a Hananui.
Huihuia ngā pōkēao. Hiko ai te uira. Karawhiua ngā hau. Āki ai te marangai ki a Motu-pōhue.
Kātahi, ka mārire te hau, ka tae a Ahoroa, ka ura aua maunga.
E taua, kāore e kore ko ngā tohu ērā ā ōu tūpuna.
Ka tarutua iho te tini o roimata i te weherua pō ia nei.
Ko wai hei piki tūranga mōu, hei whakamauru mō mātou?
Kua hūtia te manawa aroha o te whānau nei—aue! Aue!
Kōrangirangi ana a manawa, nawe ana a ngakau.
Kia riro ko te matawaia o te kamo, ko te tārere o te roimata hei whakakite i te aroha ki a koe.
Ka tangi kau ko te mapu.
Kua haere koe i te ara whānui a Tāne. Kua hoki atu ki ngā ringa a Hine-nui-te-pō, kia noho tahi ai ki o tātou tūpuna.
Ā, moe mai rā e taua. Moe mai rā.
No comments:
Post a Comment